காதலர் தினம் கவிதைகள்

                              (1)

காதலர் இதயம் இரண்டும் 

இடம் மாறின. 

மருத்துவ அறிவியல் 

மலைத்து நின்றது.

                             (2)

இந்த நொடியில்
உந்தன் சிந்தையில்
ஓடும் எண்ணம்
என்னவென்று கூறடி
எனதன்பு தோழி !

என் சிந்தை முழுவதும்
சிறைப்பட்டுக் கிடப்பதால்
எண்ணம் எதற்கும்
இடம் இல்லையே தோழி !

இந்தக் கணத்தில்

உன் கண்ணில் 

ஆடும் காட்சி

என்னவென்று  இயம்படி 

என் இனிய தோழி !

என் விழி இரண்டும் 

இமை மூடி நிற்பதால் 

காட்சி எதையும் 

காணவில்லையே தோழி !

                    

                   (3)

சுற்றிலும் நடப்பதில் 

பற்றின்றி உலகை
மறப்பதும் ஏனோ?
ஊன் உறக்கம்
துறப்பதும் ஏனோ ?
கூறடி இனியவளே !

உன் வினாவுக்கு
விடை தருவேன்
எனதருமை
சிநேகிதியே !

நேச மழையில்
நனைந்தேன்
பாச வலையில்
விழுந்தேன்
இதயத்துக்குள்
சிறைப்பட்டேன்
அன்புக் கோட்டைக்குள்
அடைபட்டேன்
ஆதரவு அரணால்
சூழப்பட்டேன்
அரவணைப்பு சங்கிலியால்
பிணைக்கப்பட்டேன்

நினைவேதும் இல்லாமல்
கனவில் மிதக்கின்றேன்
கற்பனை உலகில்
உலவுகிறேன்


                      (4)

தோழி:

இதயத்தை இழந்தேன்

என்பவளே ! அதை

இழந்ததெப்படி  என

நினைவுபடுத்திக் கூறடி !

அது எடுததுக்கொள்ளப்பட்டதா

அல்லது நீயே 

கொடுத்துவிட்டாயா?

தலைவி: 

என்ன நடந்ததென்று

எனக்கே தெரியவில்ல

பறித்துச் செல்லப்பட்டதா

அல்லது நானே கொடுத்தேனா

என அறுதியிட்டுக் கூற

என்னால் இயலவில்லையே

என் செய்வேன் தோழி !